SECKINGA

SECKINGA

Latine Sacconium, oppidum agri Raurici, proxime supra Rinfeldiam; Occupat Rheni Insulam, unde, quasi in sacco situm, forte nomen accepit. Huic initium dedit antiquissimum virginum Coenobium, Fridolini Scoti, viri sancti, bustô nobilitatum, quod Principum variorum munificentiâ insigniter auctum est: Ab aliquot inde saeculis, sub Habspurgiae Comitibus, Advocatiâ ipsis a Vestalibus delatâ. Fuerat autem Advocatorum talium munus, Coenobiorum iura possessionesque tueri, villis servisque imperare, Monastarii nomine iuramenta exigere, quaeque his similia, unde illis de iudiciorum fructibus et emolumentis pars cedebat. Imo aliquando tanta illorum auctoritas, ut Conventui, citra Advocati consensum, nihil bonorum immobilium alienare licuerit. Hodie sub Austriacis est. Vide Christ. Urstisium Histor. Basil. Stumpf. Chron. etc.